തങ്കുപ്പൂച്ചേ,... മീട്ടുപ്പൂച്ചേ ....
ഇത് പൊതു സമൂഹത്തിൽ ഉയർത്തിയ അനുരണനങ്ങൾ ചെറുതല്ല.
lockdown സമയത്ത് Victers ചാനലിൽ ചെറിയ കുട്ടികൾക്ക് വേണ്ടി സായിശ്വത ടീച്ചർ നടത്തിയ ക്ലാസ്. പഠിപ്പിക്കുന്ന വിഷയത്തിൽ ലയിച്ച്, ആത്മാർത്ഥതയോടെ, എടുത്ത ക്ലാസ്. ടീച്ചറിന്റെ തൊട്ടുമുൻപിൽ ഇരിക്കുകയാണ് കുട്ടികളെന്ന് നമുക്ക് തോന്നും.
"എനിക്ക് ആ ടീച്ചർ പഠിപ്പിക്കുന്ന സ്‌കൂളിൽ പോയാൽ മതി" എന്ന് കുഞ്ഞുങ്ങളെക്കൊണ്ട് പറയിച്ച ക്ലാസ്.
കുഞ്ഞുങ്ങൾക്ക് മാത്രമല്ല, മുതിർന്നവർക്കും ഇഷ്ടമാകുന്ന വിധം തികഞ്ഞ കൈയടക്കത്തോടെ നടത്തിയ ക്ലാസ്. കുഞ്ഞുങ്ങളുടെ ഭാവന വികസിപ്പിക്കുന്ന, അതിൽ സ്നേഹത്തിന്റെയും കനിവിന്റെയും ഉറവ ജനിപ്പിക്കുന്ന, അവരുടെ സംസാരശേഷിയും ശ്രദ്ധയുമൊക്കെ മെച്ചപ്പെടുത്തുന്ന ക്ലാസ്.
എഞ്ചിനീയറിങ്ങ് കോളേജിലെ Induction Programme
സർക്കാരിന്റെ നിർദ്ദേശമനുസരിച്ച്, ഡിസംബർ 1 ന് ഒന്നാം വർഷ ബി ടെക് ക്ലാസ് ആരംഭിക്കുകയാണ്. ഒന്നാം വർഷക്കാരെ സിലബസ് പഠിപ്പിക്കുന്നതിന് മുൻപ്, AICTE മാർഗ്ഗനിർദ്ദേശം അനുസരിച്ച്, മൂന്നാഴ്‌ച നീളുന്ന Induction Programme നടത്തണം.
ഒരു എഞ്ചിനീയർക്ക് അവന്റെ വിഷയത്തിൽ നല്ല അറിവും പ്രവൃത്തിപരിചയവും ആവശ്യമാണ്. ഒപ്പം തന്നെ താനുൾപ്പെടുന്ന സമൂഹത്തെക്കുറിച്ച് ബോധ്യമുള്ള പൗരനുമാവണം. ബന്ധങ്ങളുടെ മൂല്യം മനസ്സിലാക്കുന്ന ഒരു നല്ല മനുഷ്യനുമാകണം. ഇതൊക്കെ സ്വായത്തമാക്കണമെങ്കിൽ എഞ്ചിനീയറിങ്ങിനു പുറമേ, മറ്റു ചില കഴിവുകളുംകൂടി വിദ്യാർത്ഥി ആർജ്ജിക്കേണ്ടതാണ്.
ഏതൊരു വിദ്യാർത്ഥിയുടെയും ജീവിതത്തിലെ നാഴികക്കല്ലാണ്, സ്‌കൂളിൽനിന്ന് കോളേജിലേക്കുള്ള മാറ്റം. വൈവിധ്യമാർന്ന പശ്ചാത്തലങ്ങളിൽനിന്ന് , ഭിന്നങ്ങളായ കഴിവുകളോടെയാണ്, വിദ്യാർത്ഥികൾ കോളേജിൽ എത്തുന്നത്. കൂടാതെ, ചെറിയ അങ്കലാപ്പും ചില ആശങ്കകളുമുണ്ടാകും. പുതിയ സാഹചര്യങ്ങളുമായി പൊരുത്തപ്പെടാൻ അവനെ (ളെ) പ്രാപ്തനാക്കുന്നത് വളരെ പ്രധാനമാണ്. അപരിചിതങ്ങളായ സാഹചര്യങ്ങളെ നേരിട്ട്, സീനിയേഴ്സ്, അതുപോലെ ഒപ്പം പഠിക്കുന്നവർ, അധ്യാപക-അനധ്യാപകർ ഇവരുമൊക്കയായി, ഇണങ്ങി, കോളേജിൽ പഠിക്കണം.
വെറുതെ പഠിച്ചാൽ പോരാ, നല്ല മികവോടെ, എന്നാൽ ഒട്ടും മത്സരബുദ്ധി ഇല്ലാതെ.
ഇതിന് എല്ലാവർക്കും വ്യത്യസ്തങ്ങളായ കഴിവുകളാണെന്നു തിരിച്ചറിയണം. അതിന് അവനവനെ ആദ്യം മനസ്സിലാക്കണം.
ഇതൊക്കെ സാധ്യമാക്കാനാണ് Induction Programme നടത്തണമെന്ന് AICTE നിഷ്കർഷിക്കുന്നത്.
കലാ-സാഹിത്യ-സാംസ്കാരിക-പ്രവർത്തനങ്ങൾ, പ്രശസ്തരായ വ്യക്തികൾ നടത്തുന്ന പ്രഭാഷണങ്ങളും ശില്പശാലകളും, കോളേജ്-ഡിപ്പാർട്മെന്റ്-ലൈബ്രറി- ഗ്രൗണ്ട്, കൂടാതെ കോളേജിന്റെ സമീപ പ്രദേശങ്ങളുടെയും സന്ദർശനം, mentoring, Universal Human Values (UHV), Physical activity, തുടങ്ങിയ പാഠ്യേതര വിഷയങ്ങളാണ് ഇതിൽ ഉൾപ്പെടുത്തേണ്ടത്. കഴിയുന്നതും ഏതാണ്ട്, 20 പേർ അടങ്ങുന്ന ഗ്രൂപ്പുകളായി വിദ്യാർത്ഥികളെ വിഭജിച്ച് വേണം ആക്ടിവിറ്റികൾ നടത്താൻ.
സർക്കാരും യൂണിവേഴ്‌സിറ്റിയും മനസ്സുവെച്ചാൽ...
കേരളത്തിലെ എല്ലാ എഞ്ചിനീയറിങ്ങ് വിദ്യാർത്ഥികൾക്കും (ഗവണ്മെന്റ് എന്നോ പ്രൈവറ്റ് എന്നോ വ്യത്യാസമില്ലാതെ) പഠനനിലവാരവും വ്യക്തിത്വ വികസനവും ഒരുപോലെ ഉണ്ടാവണമെന്ന് ആഗ്രഹിക്കുന്നവരാണല്ലോ, സർക്കാരും യൂണിവേഴ്‌സിറ്റിയും.
അതുകൊണ്ട്, സ്‌കൂൾ കുട്ടികൾക്കായി നടത്തിയത് പോലെ, Victers ചാനലിൽ Induction Programmeന്റെ ഭാഗമായി ചില പരിപാടികൾ എങ്കിലും സംപ്രേഷണം ചെയ്‌താൽ നന്നായിരിക്കും.
ഇതുകൊണ്ട് പല ഗുണങ്ങൾ ഉണ്ട്.
ഏറ്റവും പ്രധാനം, എല്ലാ വിദ്യാർത്ഥികൾക്കും ഗുണനിലവാരമുള്ള ഏതാനും പരിപാടികൾ എങ്കിലും വീക്ഷിക്കാൻ സാധിക്കുമെന്നതാണ്.
ഇപ്പോൾ ഓൺലൈൻ ക്ലാസിന്റെ നിലവാരം, ഇന്റർനെറ്റ് ലഭ്യത/വേഗത എന്നിവയെ ആശ്രയിക്കുന്നുണ്ട്. എന്നാൽ Victers ചാനലിൽ സംപ്രേഷണം ചെയ്‌താൽ, ഇത്തരം തടസ്സങ്ങൾ Induction Programmeനെ ബാധിക്കില്ല.
എഞ്ചിനീയറിങ്ങ് കോളേജുകളിൽ ഇപ്പോൾ, 3, 5, 7, എന്നീ സെമസ്റ്ററുകളിലെ ഓൺലൈൻ ക്‌ളാസ് നടന്നുകൊണ്ടിരിക്കുകയാണ്. ഓൺലൈൻ ക്ലാസിന് ചില ഗുണങ്ങൾ ഉണ്ടെങ്കിലും പോരായ്മകളും ഉണ്ട്. ഇത് സിലബസിലുള്ള വിഷയങ്ങളുടെ കാര്യം. അപ്പോൾ പിന്നെ, person-to-person ഇടപെടലുകൾ ആവശ്യമുള്ള പരിശീലനങ്ങൾ ഫലപ്രദമായി നടത്തുന്നതിന് പരിമിതികളുണ്ട്.
മികച്ച രീതിയിൽ Induction Programme നടത്തുന്ന കുറച്ച് വ്യക്തികളും/സ്ഥാപനങ്ങളും ഉണ്ട്. എല്ലാ കോളേജുകളും ഒരേ സമയത്ത് Induction Programme നടത്തുന്നതിനാൽ, മുൻപറഞ്ഞ വ്യക്തികൾക്ക്, തങ്ങളെ ആവശ്യപ്പെട്ടു വരുന്ന എല്ലാവർക്കും സേവനം നൽകാൻ സാധിക്കാതെ വരുന്നു.
പല കോളേജുകൾക്കും മേൽപ്പറഞ്ഞ വ്യക്തികളെ afford ചെയ്യാൻ സാധിക്കാറുമില്ല.